नयाँ कमला पुलका लागि बजेट नछुट्याएको भन्दै संघर्ष समितिको विरोध, सभामुखलाई ज्ञापनपत्र
जनकपुरधाम जेष्ठ १८ संघ सरकारले ल्याएको बजेटमा नयाँ कमला पुल निर्माणका लागि बजेट व्यवस्थापन नगरिएको भन्दै नयाँ कमला पुल निर्माण संघर्ष समिति आन्दोलित भएको छ । समितिले नयाँ कमला पूल निर्माणकालागि बजेटको माग गर्दै मधेस प्रदेशसभाका सभामुख रामअशिष यादवलाई ज्ञापनपत्र बुझाएको छ । संघर्ष समितिले पूर्व सहमतिअनुसार पुल निर्माणको प्रक्रिया अगाडि नबढेको भन्दै विरोध प्रदर्शनसमेत गरेको हो ।
नयाँ कमला पुल निर्माण संघर्ष समिति र मधेस सरकारबीच नयाँ कमला पुल निर्माणका लागि आवश्यक बजेट आर्थिक वर्ष २०८३÷८४ को संघीय बजेटमार्फत व्यवस्था गर्न पहल गर्ने सहमति भएको थियो । संघीय सरकारले बजेट उपलब्ध नगराएमा सम्पूर्ण लागत मधेस प्रदेश सरकारले आफ्नै स्रोतबाट व्यहोर्ने तथा पुल निर्माणकालागि डीपीआर तयारीका लागि बोलपत्र आह्वान गर्ने सहमति भएको थियो ।
तर संघ सरकारले ल्याएको आर्थिक वर्ष २०८३÷८४ को बजेटमा कमला पुल निर्माणका लागि कुनै बजेट विनियोजन नगरिएपछि स्थानीयवासी तथा संघर्ष समिति आक्रोशित बनेको छ ।
सोमबार प्रदेशसभाका सभामुख यादवलाई ज्ञापनपत्र बुझाउँदै संघर्ष समितिले संघीय सरकारले सहमतिअनुसार बजेट नराखेको अवस्थामा मधेस प्रदेश सरकारले आफ्नो स्रोतबाट बजेट व्यवस्था गरी निर्माण प्रक्रिया तत्काल अगाडि बढाउन माग गरेको छ । माग सम्बोधन नभए थप सशक्त आन्दोलनमा उत्रिन बाध्य हुने चेतावनीसमेत समितिले दिएको छ ।
वर्षौंदेखि निर्माणको माग उठ्दै आएको नयाँ कमला पुल सिराहा र धनुषा जिल्लाका हजारौं नागरिकको प्रत्यक्ष सरोकारको विषय रहेको भन्दै स्थानीयवासीले अब थप आश्वासन होइन, निर्माण कार्यको थालनी चाहिएको बताएका छन् । संघर्ष समितिले सरकारसँग तत्काल ठोस निर्णय गरी पुल निर्माणको काम सुरु गर्न आग्रह गरेको छ ।
3 दिन पहिले
63 Post Views
_1703245235.jpeg)
