जनकपुरधाममा जिलियोका इलेक्ट्रिक स्कुटरको शोरुम सञ्चालनमा

• 3 दिन पहिले

जनकपुरधाम आसिन ३० गते

विद्युतीय सवारीसाधनको बजार विस्तार हुँदै गएको अवस्थामा जनकपुरधाममा भारतीय ब्रान्ड जिलियोका इलेक्ट्रिक स्कुटरको बिक्री सुरु भएको छ। जनकपुरधामको मिल्स एरियामा जनकनन्दनी ट्रेडर्समार्फत नयाँ शोरुम सञ्चालनमा ल्याइएको हो।
जनकपुरधाम उद्योग वाणिज्य संघका अध्यक्ष सुरेन्द्र भण्डारीले शोरुमको उद्घाटन गरेका हुन्। गो ग्रिन बिजनेस सोलुसन प्राइभेट लिमिटेडका निर्देशक राकेश गुप्ताका अनुसार शोरुममा जिलियोका पाँच प्रकारका इलेक्ट्रिक स्कुटर उपलब्ध छन्।
कम्पनीले सार्वजनिक गरेको जानकारीअनुसार स्कुटरको मूल्य मोडलअनुसार १ लाख ६० हजारदेखि २ लाख ३० हजार रुपैयाँसम्म निर्धारण गरिएको छ। ग्राहकले आफ्नो आवश्यकताअनुसार लिड एसिड वा लिथियम ब्याट्री जडित स्कुटर छनोट गर्न सक्नेछन्।
कम्पनीका अनुसार स्कुटरको मोडल र ब्याट्री क्षमताअनुसार एकपटक पूर्ण चार्ज गर्दा करिब ७० देखि ९० किलोमिटरसम्म चलाउन सकिन्छ। केही मोडलमा १२० किलोमिटरसम्मको दूरी तय गर्न सक्ने दाबी गरिएको छ। यद्यपि, सडकको अवस्था, सवारीको गति, ब्याट्रीको क्षमता र भारका आधारमा वास्तविक रेन्ज फरक पर्न सक्छ।
निर्देशक गुप्ताले स्कुटरको मोडल तथा ब्याट्रीअनुसार दुईदेखि तीन वर्षसम्मको वारेन्टी उपलब्ध हुने जानकारी दिए। स्कुटर खरिद गर्दा ग्राहकले ब्याट्री, चार्जिङ समय, वारेन्टीका सर्त र बिक्रीपछिको सेवाबारे विस्तृत जानकारी लिन सक्ने उनले बताए।
गुप्ताका अनुसार कम्पनीले नेपालका विभिन्न नौ स्थानमा शोरुम सञ्चालन गरिसकेको छ। जनकपुरधाममा खुलेको शोरुम कम्पनीको दसौँ शाखा भएको उनले जानकारी दिए। भारतीय बजारमा जिलियोका स्कुटरप्रति सकारात्मक प्रतिक्रिया प्राप्त भइरहेको उल्लेख गर्दै उनले मधेस प्रदेशको राजधानी जनकपुरधाममा पनि यसको माग बढ्ने अपेक्षा व्यक्त गरे।
शोरुम उद्घाटन कार्यक्रममा उद्योग वाणिज्य संघका अध्यक्ष भण्डारीले नयाँ व्यवसायको आगमनले जनकपुरधामको व्यापारिक गतिविधि थप चलायमान बनाउन सहयोग पुग्ने बताए। नयाँ ब्रान्डको प्रवेशले उपभोक्तालाई सवारीसाधन छनोटका थप विकल्प उपलब्ध हुने उनको भनाइ थियो।
विद्युतीय स्कुटरको प्रयोगले पेट्रोलमा हुने खर्च घटाउन सहयोग पुग्ने उल्लेख गर्दै भण्डारीले बजारको दिगो विस्तारका लागि गुणस्तरीय उत्पादन, प्रभावकारी बिक्रीपछिको सेवा र आवश्यक स्पेयर पार्ट्सको सहज उपलब्धता सुनिश्चित गर्नुपर्नेमा जोड दिए।

3 दिन पहिले    135 Post Views